ოკუპირებულ აფხაზეთში, ე.წ. საზღვარზე, აფხაზმა მესაზღვრემ კრიტიკულ მდგომარეობაში მყოფი 6 წლის მოზარდი უსაბუთოდ გაატარა
9 აგვისტო 2016 Shadowწყარო: pia.ge
ოკუპირებულ აფხაზეთში, ე.წ. საზღვარზე, აფხაზმა მესაზღვრემ კრიტიკულ მდგომარეობაში მყოფი 6 წლის მოზარდი უსაბუთოდ გაატარა. შემთხვევა რამდენიმე დღის წინ მოხდა.
თვითმხილველებმა საინფორმაციო ცენტრ "პირWელს" განუცხადეს, რომ ენგურის ცენტრალურ ხიდზე მყოფი აფხაზი მესაზღვრე რუს ე.წ. მესაზღვრეებს დაუპირისპირდა და მათი წინააღმდეგობის მიუხედავად, ე.წ. საბუთების არქონის მიუხედავად, მცირეწლოვანი ბავშვი, მშობლებთან ერთად, საქართველოს კონტროლირებად ტერიტორიაზე გადმოატარა.
ამ ქმედებით აფხაზმა მესაზღვრემ საკუთარი თავი საფრთხის წინაშე დააყენა. მესაზღვრე ამბობდა, რომ მის დედას ონკოლოგიური დაავადება აქვს, რომელსაც ქართველი ექიმები მკურნალობენ. "დედაჩემს ქართველი ექიმები ცივ ნიავს არ აკარებენ. სამსახურიც რომ დავკარგო, ამ ბავშვს საზღვარზე გავუშვებ"- ყვება თვითმხილველი აფხაზი მესაზღვრის ნათქვამს.
„ჩვენც გაკვირვებულები ვიყავით მისი საქციელით. გახსოვთ, ალბათ, რომ რამდენიმე წლის წინ, კრიტიკულ მდგომარეობაში მყოფი ქართველი მოზარდი, რუსმა მესაზღვრეებმა ე.წ. საბუთების არქონის გამო, საქართველოს მიერ კონტროლირებად ტერიტორიაზე არ გადაუშვეს, რის გამოც ბავშვი გარდაიცვალა",- აცხადებს "პირWელთან" საუბარში თვითმხილველი.
როგორც ცნობილია, დაშავებული მცირეწლოვანი მკურნალობას საქართველოში, ერთ-ერთ საავადმყოფოში გადის და მისი ჯანმრთელობის მდგომარეობა დამაკმაყოფილებელია.
