უკრაინის დამოუკიდებლობის დღე - 2022
24 აგვისტო 2022 Shadowდღეს უკრაინა დამოუკიდებლობის დღეს ზეიმობს. ეს დღე თანამედროვე უკრაინისთვის ყველაზე მნიშვნელოვანი დღესასწაულია, რომელიც 1991 წელს, საბჭოთა კავშირიდან გამოყოფის შემდეგ, უკრაინის მიერ დამოუკიდებლობის გამოცხადებას აღნიშნავს.
მიუხედავად იმისა, რომ წინა წლები ზეიმებითა და აღლუმებით აღინიშნა, წელს აღლუმის ნაცვლად, განადგურებული და დატყვევებული რუსული სამხედრო მანქანები, მათ შორის ტანკები, განთავსდა ხრეშჩატიკზე, კიევის მთავარ ქუჩაზე, როგორც დასტური მოსკოვის წარუმატებელი მცდელობისა აეღო დედაქალაქი ომის პირველ კვირებში.
"მტერი გეგმავდა "აღლუმის" გამართვას ხრეშჩატიკზე სამ დღეში, მაგრამ ეს არ გამოუვიდა. ჩვენმა შეიარაღებულმა ძალებმა სათანადოდ უპასუხეს", - წერს უკრაინის პრეზიდენტის აპარატის უფროსის მოადგილე, კირილო ტიმოშენკო Telegram-ში.
სიფრთხილის მიზნით, დამოუკიდებლობის დღის აღნიშვნა გაუქმდა მთელ ქვეყანაში, მათ შორის დედაქალაქ კიევში, უკრაინელებს უთხრეს, რომ თავი აარიდონ დიდ შეკრებებს. ადგილობრივმა ხელისუფლებამ - აღმოსავლეთით ხარკოვიდან დასავლეთით ლვოვამდე - გააფრთხილა ხალხი, მეტი ყურადღება მიაქციონ საჰაერო თავდასხმის სირენებს, პატივი სცენ კომენდანტის საათსა და იმუშაონ სახლიდან, თუ ეს შესაძლებელია.
„ჩვენ უნდა ვიცოდეთ, რომ ამ კვირაში რუსეთი შეიძლება ცდილობდეს რაიმე განსაკუთრებით საზიზღარი, რაღაც განსაკუთრებით სასტიკი გააკეთოს“, - გააფრთხილა პრეზიდენტმა ვოლოდიმირ ზელენსკიმ უკრაინელი ხალხი შაბათ-კვირის ვიდეომიმართვაში. „ჩვენ ვიბრძვით ჩვენი სახელმწიფოებრიობის ყველაზე საშინელ მტერთან, იმ დროს, როდესაც მივაღწიეთ ეროვნული ერთიანობის უდიდეს დონეს“, - თქვა მან.
ზუსტად ერთი წლის წინ, 24 აგვისტოს - უკრაინის დამოუკიდებლობის 30 წლისთავზე - ახალი თაობის პილოტები ხელმძღვანელობდნენ უკრაინის საჰაერო ძალებს, რომლებიც დაფრინავდნენ კიევში, დამოუკიდებლობის მოედანზე. მოიერიშე თვითმფრინავების კოლონას ხელმძღვანელობდა ანტონ ლისტოპადი, რომელიც აღიარებული იყო ქვეყნის საუკეთესო პილოტად. 30 წლის იყო, დამოუკიდებლობის წელს დაბადებული. თითქმის ერთი წლის შემდეგ, 2022 წლის აგვისტოში, ლისტოპადმა მიიღო პრეზიდენტის, ვოლოდიმირ ზელენსკისგან გამბედაობის ორდენი. ცერემონიიდან რამდენიმე დღეში იგი საბრძოლო მოქმედებებში დაიღუპა.
ლისტოპადის ამბავი შეიძლება ზედმეტად სიმბოლურად ჟღერდეს, მაგრამ უკრაინელები მიჩვეულები არიან ასეთ ტრაგიკულ სიმბოლიკას. რუსეთის შემოჭრიდან ექვსი თვის შემდეგ, მშვიდობიანი ქალაქების განურჩეველი დაბომბვით, ბუჩასა და მარიუპოლის სისასტიკითა და საშინელებებით, მაგრამ ასევე სოლიდარობით, გამძლეობითა და მსხვერპლით, რაც მათ განიცადეს - ყველაფერი უფრო მკვეთრი და ღრმა გახდა - დანაკარგების სიმწარე და გადარჩენის სიხარული.
სრულმასშტაბიან ომამდეც კი, უკრაინელებისთვის დამოუკიდებლობის დღე იყო წლის ყველაზე მნიშვნელოვანი დღესასწაული, ყველაზე ნათელი დღე, როდესაც ისინი ფიქრობდნენ არა ტირანიის და საბჭოთა იმპერიის სიკვდილზე, არამედ სახელმწიფოსა და თავისუფლების აღორძინებაზე.
